Revelation of John 11
Ta Mitema Tamei Mipalomatananu
1 aAngelo muvikalaleli aloxo ne mukalu, la milosilo lukae mautunu vile loxo vilaxo sou itilovosou mimii no anu. La mivikalaleli lexe, “Nalai mo natilovosou tani tila noxou Lataua mo valovalosou xe naitisi'a ta mitema ane ilotu no anu. 2 bIa ieni uvaxau mo natilovosou taiinu ane muxolu no ale no tani tila noxou Lataua uasi, xo taiinu ane ne milosi'a ta asila. La ane'i imaapitasou tuala tila noxou Lataua so'io itemaxu tamei mo tamei. 3Ia eni apelemasaxane'i ta mitema tamei sou ipalomatana no anu vaikala noxilo voxo 1260. Ane'i ilou itokolomoxu tokolomosou tama.” 4 cAne'i ilou ane ovu olivu tamei xe mii sou itulusou telu no anu tamei e ututulu no talaxu. Lataua anu tila sou usaxila'a ta mitema no lia 'o mukalusi. 5 dIa lexe evile utovosou u'oxo masuane'i, la navu ulaa no anaxa'a sou u'elaxa'a ta uluai'a. La sou 'ei ane umasaxa u'oxo masuane'i, la anu usolisi. 6 eLa sou ane'i ta mitema tamei ne Lataua ulosi'a xavi sou itatusou loxotolo la la'iua usili uasi no mine ane'i ilou ipalomatana no anu vaikala noxou. Mo ulosi'a xavi sou ixiunu lexa uxali sialu xe ipuapuasi'a ta mitema no lia 'o ukalusi no anu tu'utu'umaxu iouiou alaxu tavu'alo no 'a masaxa noxi'a.7 fXe no mine ane'i ilou ipalomatana no anu vaikala noxou Lataua ukalu, la mii vova e uxolu no taxa ane kaluxu uasi ne ulaa uuatusou ilo'a i'oto. Ilo'a i'oto la anu xaviinu musuku la uve'a ilou isoisoli. 8 gLa vasime'a ilou usu'anu uai no vote'i no tuala tila itovola'inu lexe Sodomu ilee Aixiputo. No anu tuala tila ane ne, la ane'i mililixu Tila noxi'a ilou no ovu valautu ane. 9La ta mitema ane vasime'a kaukavunu iouiou mo mata iouiou mo vaivaikalai'a iouiou no xalexalee tuatuala mukalusi ine'e imamaisou vasime'asi voxo tatalu mo pa'usou, ia imasaxa sou ino'u mo i'asixu uasi. 10Mo ane'i ane ixoxolu no lia 'o i'osasi'a la isovai'a mimii ngatongato'o. Xo ta mitema sou palomatana tamei milosi'a tu'utu'umaxu ne misoisoli.
11 hIa voxo tatalu xe pa'usou mukalu, la tauuxu Lataua sou mauli mu'una noxi'a ilou, la ilou mitulu. Ane'i mimaisi'a ilou aloxo ne, la mimama'u manina misevile. 12 iAne'i ilou mitulu mukalu, la milomusou 'ava toxoxa'a molu teitexi no opo loxotolo mulu'e noxi'a ilou aloxo 'o, “Ngongou ngatelo.” La ane'i ilou mitelai no anu tamuxala, ia ta uluai'a mitulu mimaisi'a ilousi.
13 jNo mine ane'i ilou mitelaisi ka laliua toxoxa'a manina mukunikuni, la xalee mavulovexasou tuala tila ne mumamulo. Xe ta mitema itiitisi'a muxali loxo 7,000 misoisoli no anu. Ia ane'i ane isoisoli uasi ne mimama'u la mi'itinu Lataua uxolu no opo loxotolo ualasou.
14 kLa tu'utu'umaxu tameisou a mukalu ne. Ia tatalusou a 'ala'alaisi sou uxali.
Xoolau Muxatele Tameisou
15 lXe angelo muxatele tameisou noxi'a mutaunu xoolau noxou, la 'ava tavu'alo toxotoxoxa'a molu teitexi no opo loxotolo mivikala aloxo 'o,“Ta mitema no tuatuala mukalusi no lia 'o ne,
mixali Tilasinge ta na'u mo Kalisito noxou.
La Anu usaxila'a no voxovoxo utotomu mo kaluxu uasi.”
16La ta tatila itemaxu vile mo tami'a e mixolu no luusi'a no talaxu Lataua ne, mitangatulu mulu'elai no lia sou milotu noxou, 17ia mivikala aloxo 'o,
“Nini Tila mo Lataua xavineni musuku misevile nemauli tei
mo nemauli vaimomo 'o.
Nexi talemolu laixe ulai noxine, xo nini xavineni musuku
la sou nini nasaxila'a ta mitema no lia 'o.
18 mLa ane'i ta mitema no lia 'o la'iaxa'a.
Ia voxosou la'ia noxine a muxali.
La nini natulusi'a ta mitema misoisoli no anu vaivaikala
sou nalosi'a lakolisou xaixai noxi'a ane'i ane ta mitema sou xaixai vitanisi
ane mipalomatana no anu vaikala noxine ilo'a ta mitema noxine
mo ane'i ane ino'u uala tila uasi xe ane'i ane mino'u uala tila la mitoxoneni.
Mo nakalusi'a ane'i ane mi'oxo masuane'i ta mitema.”
19 nAne'i mivikala aloxo ne mukalu, la tani tila noxou Lataua teitexi no opo loxotolo mukisi. La eni emaisou lavokisi sou vaikala noxou Lataua ane musakii no anu no nano no taasou lalotu noxou Lataua. Mo emaisou lele'e ulamilami mo upaupau la luluxu uvalivalixumu. Mo laliua ukunikuni xe aesi lavolavo'o toxotoxoxa'a ulapalapau.
Copyright information for
ATA